Ўзбекистон Биринчилигида иштирок этаётган  “Насаф-2” жамоаси меҳмонда Ғаллаоролнинг «Ғаллакор-Автомобилчи» клуби билан беллашиб, 2:1 ҳисобида ғалаба қозонганидан сўнг жамоа  мураббийи Шуҳрат ТОШПЎЛАТОВ билан қисқача суҳбатда бўлдик.

— Ўйин ҳақида тўхталадиган бўлсам, аввало шуни айтиш керакки, майдон аҳволи жуда қониқарсиз даражада эди. Шунга қарамай,  учрашувни ҳужумкор тарзда бошладик, гарчи меҳмонда ҳаракат қилаётган бўлсак-да, йигитларга фақат олдинга интилиш кераклигини тайинладим. Ўйинга ҳужумкор тактикани қўллагандим ва бу якунда ўз мевасини берди. Умуман мен ҳужумкор футбол тарафдориман. Шогирдларим бугун берган кўрсатмаларимни ортиғи билан бажаришди. Ваҳоланки, майдон аҳволи ҳали айтиб ўтганимдек, футбол ўйнаш учун умуман тайёр эмасди. Жамоамиз охирги ўйинларда ўзига келиб қолди. Биласиз, илк турларда имкониятларни бой берганимиздан сўнг йигитларга руҳий тушкунлик бор эди. Биз уларга керакли кўрсатмаларни бериб, руҳан уларни кўнглини кўтариб ўзларига бўлган ишончни келтира олдик ва бу ўз самарасини бермоқда. Келгуси учрашувларда, ўйламанки, янаям яхши, чиройли футбол намойиш этиб, керакли натижаларни қўлга киритишда давом этамиз.  22 апрелда эса Рўзиқул Бердиев бошчилигидаги “Насаф” жамоамиз ҳам ўзининг чемпионат доирасида  навбатдаги, ўз мухлислари қаршисида эса илк ўйинини ўтказади. Бу баҳсда “Насаф”га омад ёр бўлишии истаб қоламан.