Ўзбекистон Профессионал футбол лигаси сўнгги икки мавсумдан буён Ўзбекистон кубогининг финал учрашувига мезбонлик қилувчи стадион номига шаффоф қуръа ёрдамида аниқлик киритиб келмоқда. Шунга кўра 2020 йилги кубок финалига Наманган мезбонлик қилган бўлса, 2021 йилда бу вазифа Самарқанд шаҳри чекига тушганди.
Финал кетма-кет икки бор битта шаҳарда ўтмаслигини таъминлаш мақсадида бу йилги қуръада Самарқанд шаҳри иштирок этмайди. 2022 йилги Ўзбекистон кубогининг финал учрашувига 6 та шаҳарнинг 8 та стадиони даъвогарлик қилади.
Финал мезбонини аниқлашда дастлаб Тошкентнинг уч стадиони — “Пахтакор”, “Бунёдкор” ва “Локомотив” саватчаларга ташлаб олинади. Мазкур уч стадиондан бири қуръанинг иккинчи босқичида Тошкент шаҳри номидан иштирок этади. Барча шаҳарларда имконият тенг бўлиши ва бунда пойтахтнинг имконияти қолганларникидан юқори бўлмаслиги учун шундай қарорга келинган.
Қуръанинг иккинчи босқичида 6 та шаҳар саватчага ташланади: водийнинг Наманган, Фарғона, Яйпан шаҳарлари, пойтахт Тошкент, шунингдек воҳанинг Қарши ҳамда Бухоро шаҳарлари. Айни вақтда Наманган, Тошкент, Яйпан ва Қаршидаги стадионлар финал талабларига жавоб беради. Фарғонадаги “Истиқлол” ҳамда Бухородаги “Бухоро” стадионларида эса таъмирлаш ишлари давом эттирилмоқда. Ишонамизки, финал учрашувига қадар мазкур стадионлар ҳолати яхшиланиб улгуради.
Ўзбекистон Профессионал футбол лигаси Суперлига ва Про лига клубларининг уй стадионларига қўйилаётган талабларни босқичма-босқич қатъийлаштириб боради. Режамизга кўра, олдиндаги уч мавсум давомида барча майдонлар сифати талаб даражасига келтирилиши керак.
