Туриннинг "Ювентус" клуби ушбу мавсумда Италия чемпионатини ютиб олса, либосидаги ёрлиққа яна бир юлдузчани қўшиб қўйиш ниятида. Аммо бундай йўл тутиш анъанага хилоф эканини Tuttosport таъкидламоқда.
2005, 2006 йиллардаги Кальчополи машмашаларидан кейин "Ювентус"дан икки скудетто тортиб олинганди. Энди туринликлар ҳисобида 27 та расмий чемпионлик мавжуд.
Италияда жамоалар либосидаги ҳар бир юлдузча ўша клубнинг 10 бор А Серия ғолиби эканидан дарак беради. Агар "кекса синьора" ушбу мавсум чемпионлигини қўлга киритса, учинчи юлдузча учун ҳеч бўлмаганда қоғозда икки унвон камлик қилади.
Аммо клубдагилар ўша тортиб олинган икки чемпионлик ноҳақлик эканини ва бугунгача "Ювентус" 29 бор мамлакат чемпионатида ғолиб чиққанини пеш қилишмоқда. Навбатдаги қўлга киритиладиган чемпионлик эса айнан ўттизинчиси экан.