Уганда миллий жамоаси бош мураббийи Милутин Средоевич Ўзбекистонга қарши бўлиб ўтган учрашувдан сўнг матбуот анжуманида иштирок этиб, ўз фикрлари билан ўртоқлашди.

"Аввало мусобақани ташкил этган Ўзбекистонга миннатдорчилик билдираман. Ёш футболчилардан ташкил топган жамоамизни синовдан ўтказиб олиш учун яхши мусобақа бўлди. Айрим футболчиларимиз 20 ёшгача бўлган футболчилар ўртасидаги Африка чемпионатида иштирок этишганди. Намангандаги мусобақа улар учун яхши тажриба бўлди. Уганда ва Ўзбекистон чемпионатлари ўртасида фарқ бор. Ёш футболчилар Ўзбекистон каби жамоага қарши ўйнаш имкониятига эга бўлишди. Бу улар учун муҳим аҳамиятга эга. Июнь ойида бўладиган Африка миллатлар кубоги саралаш босқичи олдидан ўзим учун тегишли хулосаларни чиқариб олдим.

Ўзбекистон - жуда яхши жамоа ва уни яхши савиядаги футболчилар бор, шунингдек, бу жамоани яхши мураббий бошқармоқда. Мезбонларни мухлислар яхши қўллаб-қувватлаб туришди.

Биринчи голда футболчиларимиз қўпол хато қилишди ва Машарипов ундан самарали фойдаланди. Шунингдек, Шомуродов ва 18-рақамли футболчи (Азиз Амонов) шогирдларим учун бошоғриқ бўлишди.

Марказий Осиёда ҳужумкор ўйин намойиш этадиган яхши жамоалар бор. Уларни Африканинг шимолий қисмида жойлашган Марокаш, Миср ва Тунис терма жамоаларга таққослаш мумкин.

Ўзбекистонга меҳмондўстлик учун миннатдорчилик билдираман. Ташкилотчилик юқори даражада бўлди. Умид қиламан, Ўзбекистон ҳам бизга қарши ўйинда етарли хулосалар олди. Ўзбекистонда барча футболни севишига гувоҳ бўлдик", — деди сербиялик мутахассис.