Португалия терма жамоаси ярим ҳимоячиси Бруну Фернандеш ЖЧ-2022 саралаши учун плей-офф ўйинида Шимолий Македония устидан қозонилган ғалаба (2:0) ҳақида фикр билдирди.
"Ушбу ўйин эсда қолиши керак, чунки биз жаҳон чемпионатига чиқдик. Бу жуда муҳим ўйин бўлди, мухлислар жуда яхши қўллаб-қувватлашди. Стадиондаги бугунги муҳит ажойиб эди. Одамлар бизга нима кераклигини тушунишди. Асосийси Португалия ғалаба қозонди.
Ҳамманинг амбициялари бор. Роналду ҳам, мен ҳам бундан мустасно эмасмиз. Одатда у гол уради, мен эса ассистентлик қиламан. Аммо бугун бунинг акси бўлди. Мен учун асосийси жамоага ёрдам бериш. Иложи бўлса, голлар билан ёрдам бериш. Албатта, ҳаммамиз ҳар бир ўйинда, хоҳ муҳим ўйин бўладими, хоҳ аҳамиятсиз ўйинда гол уришни яхши кўрамиз. Мураббийимизнинг фикрларини эътибордан четда қолдирмайман ва шунинг учун бўлса керак, бу дублни амалга оширдим. Мен ҳар доим мураббий сўраганини қилишга ҳаракат қиламан», - деди Фернандеш УЕФА расмий сайтига.
