Англия Премьер-Лигаси танаффусдан сўнг яна қайтмоқда.
Бугун Тошкент вақти билан 16:30да «Ливерпуль» ва «Уотфорд» жамоалари ўртасидаги баҳс билан Англия чемпионати 31-тур учрашувларига старт берилади.
Мазкур баҳс бошланишига ҳам оз қолди. Асосий таркиблар маълум қилингунига қадар бир қанча қизиқарли маълумотларни сизга тақдим этамиз.
Биласизми?
Бугун «Ливерпуль» 3 очко қўлга киритса ёки дуранг натижа қайд этса, бугун «Сити» ва «Бёрнли» учрашуви бошлангунига қадар Англия чемпионати жадвалида етакчига айланиб олади.
Айни вақтда «Ливерпуль» ва "Манчестер Сити" жамоалари 29 учрашувдан кейин мос равишда 69 ҳамда 70 очко жамғаришган. Тўплар нисбатига кўра устунлик мерсисайдликлар томонида.
«Ливерпуль»нинг айни вақтдаги асосий юлдузи Муҳаммад Салаҳ АПЛ доирасидаги «Уотфорд»га қарши 7 баҳсда 11 голда иштирок этган (9 гол ва 2 ассист). Мисрлик вингер «сариқлар»га қарши ҳар 57 дақиқада гол ёки ассисй қайд этмоқда. Бу мусобақа тарихида бир рақибга қарши баҳсда (камида 600 дақиқа ўйин) энг сермаҳсул тўртинчи натижа ҳисобланади. Статистикага назар соладиган бўлсак, Салаҳ «Уотфорд» учун энг ноқулай ва хавфли футболчи ҳисобланади.
«Уотфорд» клуби Рой Хожсон бошқарувидаги 6 АПЛ сафар ўйинида 8 очко жамғарди (иккитадан ғалаба, дуранг ва мағлубият). Бу уларнинг мусобақадаги олдинги 17 сафар баҳсида қайд этган натижаси билан бир хил (2 ғалаба, 2 дуранг, 13 мағлубият). Жамоа ўтган турда «Саутгемптон»ни 2:1 ҳисобида мағлуб этди, аммо 2017 йилнинг сентябрь (қаторасига учта ғалаба) ойидан бери кетма-кет АПЛ сафар баҳсларида ғалаба қозона олмаяпти.
«Уотфорд» ўйинчиси Кучо Эрнандес Премьер-Лига доирасидаги сўнгги 3 учрашувида 4 голда бевосита қатнашди. Бу унинг мусобақадаги дастлабки 19 ўйинда қайд этган натижасидан (2 гол ва 1 ассист) кўпроқ дегани.
Баҳс расмийлари
Бугунги учрашувни Стюрат Атуэлл бошчилигидаги ҳакамлар бригадаси бошқариб бошқариб боришади.
Бош ҳакам: Стюарт Атуэлл
Қанот ҳакамлари: Марк Перри, Тимоти Вуд
Захира ҳаками: Тони Харрингтон
ВАР: Жон Брукс
ВАР ёрдамчиси: Саймон Беннет
Жамоаларнинг Англия чемпионати доирасдаги охирги 5 учрашувида «Ливерпуль» 4 маротаба ғалаба қозонган ва битта баҳсда имкониятни бой бериб қўйган. Ўша ўйин 2020 йилнинг 29 февраль куни ўтказилганди.
16.10.2021
«Уотфорд» 0:5 «Ливерпуль»
29.02.2020
«Уотфорд» 3:0 «Ливерпуль»
14.12.2019
«Ливерпуль» 2:0 «Уотфорд»
27.02.2019
«Ливерпуль» 5:0 «Уотфорд»
24.11.2018
«Уотфорд» 0:3 «Ливерпуль»
«Уотфорд» 29 баҳсдан кейин 22 очко тўплаган ҳолда АПЛ жадвалининг 18-ўрнида бормоқда.
