Нидерландия терма жамоаси бош мураббийи Луи Ван Гал саратон касаллигига чалинганини маълум қилди.
«Ҳар сафар терма жамоада бўлганимда тунда касалхонага боришга тўғри келарди ва шу пайтгача футболчилар бундан бехабар эди. Улар мени соғлом деб ўйлашади, аммо соғлом эмасман», — деди Ван Гал Нидерландия телеканалларидан бирида.
70 ёшли мутахассис простата саратонининг агрессив шаклига эга эканлигини айтди. Ҳозиргача у 25 муолажадан ўтган.
Қатарда бўлиб ўтадиган ЖЧ-2022да Нидерландия терма жамоаси Қатар, Сенегал ва Эквадор билан тўқнаш келади. Биринчи ўйинда 21 ноябрь куни нидерландияликлар Сенегал терма жамоаси билан тўқнаш келишади.
