“Днепр” ҳимоячиси Виталий Денисов чемпионат.ком сайтига берган қисқача интервьюсида Чемпионлар лигасининг финалида қайси жамоага мухлислик қилишини айтиб ўтди.

“Отам Ўзбекистонда машҳур футболчи бўлгани учун мен ҳам футболга кириб келганман. Футбол билан шуғулланишга ҳеч ким мажбур қилмаган. Албатта, қалбимнинг тубида ҳужумда ўйнаш истаги бор эди, аммо мен ҳимоячиман.

“Днепр”да иккита гол урган бўлсам, расман битта голим инобатга олинган. Иккинчи голим Руслан Ротань номига ёзилган. Клуб сафида “Шахтёр” устидан ғалаба қозонган ўйинимиз хотирамда яхши сақланиб қолган. Мен ўша ўйинда Корниленкога голли пас бердим. Шунингдек, жарима тўпини ҳам ишладим ва ўша вазиятда учинчи голни урдик.

Футболчиликни тугатганимдан кейин нима иш билан шуғулланишни ҳали ўйлаб кўрмадим. Ҳозирча эса “Днепр”да ўйнашда давом этаман. Бошқа жамоалардан таклифлар йўқ.

Европада “Реал” ва “Арсенал”га мухлислик қиламан. Чемпионлар лигаси финалида эса “Челси”га ишқибозлик қиламан, лекин унда “Бавария”нинг имконияти кўпроқ”, дейди Ўзбекистон миллий терма жамоаси футболчиси.