Эрик тен Хаг ниҳоят ёзда Премьер лигада иш бошлаши мумкин. ОАВ хабарига кўра, у «Манчестер Юнайтед» бошқарувини қабул қилади. Шу сабаб «қизил иблислар» бош мураббийлигига асосий номзод ҳақида бироз фикр юритишга қарор қилдик.
ОАВ хабарларига кўра, Эрик тен Хаг «Манчестер Юнайтед» бош мураббийи бўлиш фаворитларидан бири ҳисобланади. 52 ёшли мутахассис аллақачон инглиз клуби раҳбарияти билан суҳбатлашган ва ҳозирда ҳар икки томон ҳаммузокара ўтказмоқда.
Тен Хаг узоқ вақтдан бери катта клубларда иш бошлаши тахмин қилиниб келаётган мураббий ҳисобланади, аммо у ҳозирча «Аякс» бошқарувида ишлади. «Твенте» билан мамлакат кубогини қўлга киритган бўлса-да, Тен Хаг футболчилик фаолияти билан мақтана олмайди. Унинг асосий муваффақиятлари мураббийлик билан боғлиқ.
Тен Хаг «Твенте»да иш бошлаган ва у ерда ёшлар жамоаси бош мураббийи сифатида фаолият олиб борган. Кейин Фред Руттен уни клубнинг асосий жамоасига ёрдамчи қилиб олди, шундан сўнг ПСВга таклиф қилинди. 2012 йилда тен Хаг ўзининг мустақил мураббийлик карьерасини бошлади. У Голландия иккинчи дивизиони аъзоси «Гоу Эхед Иглз» жамоасини бошқариб, биринчи уринишдаёқ жамоани элитага олиб чиқди. Бироқ, кутилмаганда у «бургутлар»ни тарк этди. Тен Хаг Мюнхенга йўл олди ва у ерда «Бавария»нинг иккинчи жамоасини қабул қилди. Голландиялик мураббий буни немис клуби устози Хосеп Гвардиола ишини ўз кўзлари билан кузатиш истаги билан изоҳлади.
2015 йилда тен Хаг яна мустақил мураббийлик фаолиятини давом эттиришга қарор қилди ва Голландиянинг «Утрехт» клубини қабул қилди. Биринчи мавсум натижаларига кўра, жамоа чемпионат жадвалида бешинчи, бир йилдан сўнг тўртинчи ўринни эгаллади. «Утрехт» билан Европа лигасида ғолиб чиққан Тен Хаг Голландиянинг энг яхши мураббийи деб тан олинди.
У 2017 йилнинг декабрида «Аякс»ни қабул қилиб олди. Бу вақтга келиб, Амстердам жамоаси тўрт ярим мавсумдан бери совринсиз қолиб келаётганди. 2018/19 йилги мавсум «Аякс» учун янги асрдаги энг омадли йил бўлди. Улар «олтин дубл»ни қайд этиб, беш йил ичида биринчи марта чемпионликни қўлга киритди! «Аякс» бир мавсумда 160 та гол билан Голландия клублари рекордини ўрнатди! Амстердам жамоаси Чемпионлар лигасида асосий эртакни яратиб, плей-офф босқичида «Реал» ва «Ювентус»ни мағлубиятга учратиб, ярим финалга чиқди. Аммо финалга бир қадам қолганда, «Аякс» «Тоттенхем»дан тарсаки еди. Аниқроғи, 90+5 дақиқада гол ўтказиб юборган амстердамликлар финал йўлланмасидан қуруқ қолди.
Ўшанда «Аякс» янгидан қурилаётган клуб эди. Бундан ташқари, де Йонг, ван де Бек жуфтлиги жуда ажойиб ҳаракат қилишарди. Бу Голландия футболининг анча қизиқарли эволюциясига ўхшарди. Ёзда «Аякс» «Барселона»га ўтган де Йонгни ва «Ювентус»га ўтган де Лигтни йўқотди. Ўшанда ҳамма тен Хагнинг катта клубга кетишини кутишган эди, аммо у Амстердам жамоаси билан шартномани узайтирди.
Коронавирус туфайли 2019/20 йилги мавсум якунланмади, бироқ «Аякс» чемпионликни қўлга киритди. Ўтган йили Амстердам жамоаси яна биринчи ўринни эгаллади. Жорий мавсумда ҳам улар яна пешқадам бўлиб турибди, бундан ташқари, 28 учрашувда атиги 14 та гол ўтказиб юборган. Айниқса, +69 кўринишдаги тўплар фарқи, шунчаки, даҳшат.
Тен Хаг - жуда қизиқарли ва тактик ўйин қура олади. Бу мавсумда «Аякс» Чемпионлар лигасида жуда яхши ўйнади, аммо 1/8 финалда «Бенфика»дан мағлубиятга учраб, турнирни тарк этди. Афтидан, бу натижа ниҳоят тен Хагни катта ғалабалар учун кучли ижрочилар кераклигига ишонтирди. «Аякс» ҳали ҳам топ даражадаги футболчиларни сотиб олишга қурби етмайди, аксинча, ўз етакчиларини сотади.
Сер Алекс Фергюсон кетганидан бери «Манчестер Юнайтед»да тактик мураббий ишламади. Премер-лиганинг қолган клублари кучли мураббийларни чақиришса, манкунианликлар шунчаки йирик номларни афзал кўришди. Тен Хаг - тактик мутахассис. Асосий савол - у ўзининг қийин ўйинини топ футболчилар билан ўтказа оладими? Албатта, буни вақт кўрсатади.
