Ўзбекистон миллий терма жамоаси аъзоси Одил Аҳмедов Россиянинг машҳур football.kulichki.net интернет-нашри версиясига кўра 41-турнинг рамзий терма жамоасига киритилди. Қайд этиш керак, Аҳмедов 40-тур якунида ҳам бунга муваффақ бўлганди.
41-турда Москванинг «Локомотив» клубини қабул қилган «Анжи» 3:1 ҳисобида ғалаба қозонди. Самуэль Это‘Онинг иккинчи бўлимдаги дубли маҳачқалъаликларга муҳим уч очко келтирди. Чемпионат якунига 3та тур қолганда 66 очко жамғарган «Анжи» Премьер-лигада 5-ўринни эгаллаб турибди. Бу билан Гуус Хиддинк шогирдлари 2-ўринда бораётган «Динамо»дан 3 очко ортда қолишмоқда. Маълумот ўрнида қайд этиш керакки, Россия Премьер-лигасида дастлабки икки ўринни қўлга киритган жамоалар Европа чемпионлар лигасининг гуруҳ босқичига тўғридан-тўғри йўлланма олади. Бу билан «Анжи» қитъа клубларининг энг йирик мусобақасида иштирок этиш учун яхши имконият ҳосил қилган. Келаси 3та турда «Анжи» - «Кубань», «Рубин» ва чемпионликни қўлга киритиб бўлган «Зенит»га қарши кураш олиб боради.
Сўнгги икки турдан бери рамзий терма жамоага кириб келаётган Одил Аҳмедов қаторида Петр Вашек (Томь) Александр Анюков (Зенит), Игорь Армаш (Кубань), Николас Ломбертс (Зенит), Кристиан Ансалди (Рубин), Шамиль Лахиялов (Анжи), Маркос Пиццелли (Кубань), Зоран Тошич (ЦСКА), Самуэль Это'О (Анжи), Юра Мовсисян (Краснодар) каби футболчилар ҳам 41-турнинг рамзий терма жамоасидан жой олишди.
