“Аделаида Юнайтед” клубидан учрашувдан олдинги матбуот анжуманида бош мураббий Лучано Трэни ҳамда жамоа сардори, дарвозабон Евген Галекович қатнашдилар.

- Сиз дурангга ҳам розимисиз ёки фақат ғалабагами?

- Биз фақат ютуқ ҳақида ўйлаяпмиз. Чунки қўлга киритилажак 3 очко 99 фоизга бизга гуруҳда биринчи ўринни таъминлайди. Бироқ ҳали ҳаммаси олдинда. Эртанги рақибимиз хавфли рақиблар сарасига киради. “Бунёдкор” жудаям яхши жамоа. Шунинг учун биз эртанги беллашувда жудаям эҳтиёткор бўлишимиз зарур.

- Австралияда футбол мавсуми тугаган. Шогирдларингизда етарлича чарчоқ тўпланган бўлса керак?

- Албатта. Нафақат футболчилар, балки ҳамма ҳордиқ чиқаришга чанқоқ турибди. Аммо биз ўз олдимиздаги вазифани охиригача бажариб қўйишимиз лозим. Осиё Чемпионлар лигасининг гуруҳ босқичидаги ҳамда ният қилиб турган нимчорак финалдаги ўйинларимизни муваффақиятли ўтказиб олайлик, кейин бемалол дам олсак бўлаверади.

- Мавсум сўнгида захира ўриндиғининг узунлиги жамоага қўл келиши мумкин. Сизда захирада етарли кучлар борми?

- Ҳа, захирада куч тўплаб турган бир нечта футболчиларимиз бизга ёрдам беришларига умидворман.

- Уларга кўпроқ ўйнаш имконияти беришга чўчимайсизми?

- Йўқ. Мен уларга ишонаман. Бироқ бу Чемпионлар лигаси турнири эканлигини ҳам ҳамиша ёдда тутишимиз керак. Бундай кучли мусобақада турли хил экспериментлар ўтказиш қалтис натижаларга олиб келиши мумкин.

- Келаси мавсум учун ҳам хулосалар қилиб қўйгандирсиз?

- Албатта, биз таркибимизга бир нечта янги футболчилар жалб қилишни ўйлаб қўйдик. Агар таркибимизни янада яхшиламасак, кейинги чемпионатимизда бизга бундан-да оғир бўлади.

- “Бунёдкор”нинг қайси футболчилари сизларга кўпроқ муаммо туғдиришлари мумкин?

- Тошкентликларнинг қанотлардан уюштирадиган ҳужумлари анча хавфли тусга эга. Чап тарафдан Дэвид Карни ҳамда ўнг қанотдан Виктор Карпенколарнинг ўйинини ёпишга ҳаракат қилиш илинжида бўламиз. Менимча, “Бунёдкор”нинг энг кучли нуқталари мана шу қанотлар.