«Реал» бош мураббийи Карло Анчелотти ўзини Италия терма жамоаси бош мураббийи сифатида кўрмаслигини айтди. Мутахассис клубда ишлашни ёқтиришини, аммо терма жамоада ишлаш имконияти ҳақида ўйламаганини айтди.
«Фикримни ўзгартирмагунимча, терма жамоага мураббийлик қилмайман. Мен йилига уч марта машғулот ўтказишни хоҳламайман», - дея Анчелотти сўзларини келтиради Football Italia.
Аввалроқ Италия футбол федерацияси раҳбарияти терма жамоани тарк этиши мумкин бўлган Роберто Манчини ўрнига номзодларни кўриб чиқаётгани ҳақида хабар берилганди.
Италия терма жамоаси Шимолий Македонияга мағлуб бўлди ва кетма-кет иккинчи бор жаҳон чемпионатида иштирок этмайди.
