Мюнхеннинг "Бавария" клуби собиқ бош директори Карл-Хайнц Румменигге жамоанинг Чемпионлар лигаси ярим финалига чиқишига ишонмоқда.

Мюнхен клуби турнирнинг 1/4 финали дастлабки ўйинида «Вильярреал» жамоасига 0:1 ҳисобида имкониятни бой берди.

“Ўйлайманки, «Бавария» янада олдинга боради, чунки улар яхшироқ. Қолаверса, ўз майдонида - 70000 нафар мухлиси кўз ўнгида ўйнашади.

Бу ҳолатни аввал ҳам кўрганман: 2015 йилда Пеп Гвардиола қўл остида чорак финалнинг биринчи ўйинида «Порту»га 1:3 ҳисобида мағлуб бўлгандик. Шундан сўнг ҳақиқий жанг бошланди. Жавоб ўйинида эса «Альянс Арена»да 6:1 ҳисобида зафар қучдик. Босим баъзан фойдали бўлади, лекин, албатта, ундан қочиш мақсадга мувофиқдир.

Туринда бўлиб ўтган «Вильярреал» - «Ювентус» учрашувини томоша қилдим. Улар ўйиндан завқ олишни билишади. «Бавария» биринчи дақиқалардан ҳужумга ўтиши керак. Яхшиямки сафар голи тизими бекор қилинди.

«Бавария» ярим финалга йўл олади", - деди Мюнхен клубининг собиқ бош директори Tz нашрига берган интервьюсида.