«Тоттенхэм» клуби «Ювентус» ярим ҳимоячиси Уэстон Маккенни сотиб олиш имкониятини ўрганмоқда.
АҚШ терма жамоаси футболчиси 2020 йилда «Шальке»дан ижара асосида «Ювентус»га ўтган ва бир йилдан сўнг Турин клуби уни 20,5 миллион еврога тўлиқ сотиб олганди. Андреа Пирло бошчилигидаги дебют мавсумида Маккенни «Ювентус»нинг асосий футболчисига айланди.
Футболчи «Ювентус»нинг амалдаги бош мураббийи Массимилиано Аллегри даврида ҳам ўз мақомини сақлаб қолди. У ушбу мураббий қўл остида 28 ўйинда майдонга тушди ва 4 та гол муаллифига айланди, бироқ февраль ойида қўл суяги жароҳати сабаб мавсумнинг қолган қисмида майдонга туша олмаслиги аниқ бўлди.
Қайд этилишича, «Тоттенхэм» бош мураббийи Антонио Конте футболчининг ўйинидан ҳайратда қолган ва уни ўз жамоасига таклиф қилмоқчи. Маккеннининг «Ювентус» билан шартномаси 3 йилдан кейин тугайди.