«Реал Мадрид» бош мураббийи «Челси»га қарши ўйинда Тони Кроос захирага олинганидан кейин у билан юзага келган можарога ойдинлик киритди.
Эслатиб ўтамиз, германиялик ярим ҳимоячи Чемпионлар лигаси 1/4 финалининг «Челси»га қарши жавоб учрашувида (2:3) 73-дақиқада Эдуардо Камавинга билан алмаштирилган эди.
Кроос майдонни тарк этар экан, мураббийнинг қароридан норозилигини очиқ кўрсатди, аммо италиялик мутахассиснинг сўзларига кўра, улар ўртасида ҳеч қандай зиддият йўқ.
«Унинг муносабати мени хафа қилгани йўқ. У Анчелоттидан эмас, мураббий Анчелоттидан ғазабланди. Биз юзма-юз гаплашиб, ҳеч қандай муаммо йўқлигига келишиб олдик. Тони нафақат футболчи, балки инсон сифатида ҳам яхши. Ўйиндан кейин ҳаммаси ҳал бўлди», - деди Анчелотти.
