«Кристал Пэлас»да ижара асосида ўйнаётган «Челси» ярим ҳимоячиси Конор Галлахер «аристократлар»га қайтмаслиги мумкин, деб хабар беради Sky Sports.

Манбага кўра, «Кристал Пэлас»нинг раҳбари Стив Периш Галлахернинг ижараси тугаганидан кейин жамоасида сақлаб қолмоқчи. Конордан ташқари Париш ўз клубида «Челси»нинг яна бир футболчисини, яъни 2017/18 йилги мавсумда «бургутлар»да ўйнаган Рубен Лофтус-Чикни ҳам кўришни истайди.

Галлахер «Челси» тарбияланувчиси. Аммо у ҳали асосий жамоасида дебют қилгани йўқ. Футболчининг лондонликлар билан шартномаси 2025 йилгача мўлжалланган.

Жорий мавсумда 22 ёшли англиялик футболчи клуб сафида барча турнирлар доирасида 32 та ўйинда майдонга тушиб, 8 та гол ва 5 та голли узатмани амалга оширди. Унинг нархи 25 млн еврога баҳоланмоқда.