"Насаф" бош мураббийи Рўзиқул Бердиев Осиё Чемпионлар лигаси гуруҳ босқичи сўнгги 6-туридан ўрин олган "Ал-Веҳдат"га қарши ўйин олдидан ўз фикрлари билан ўртоқлашди.
"Биз мақсадга жуда яқинмиз. Ҳаммаси ўзимизга боғлиқ. Эртага “Ал-Веҳдат”га қарши ақл билан бор маҳоратимизни кўрсатиб, ҳаммани хурсанд қилишга ҳаракат қиламиз.
- Жамоангиз эртага ютса ўз тарихида биринчи бор гуруҳдан чиқиб, ўз юришини кейинги босқичда давом эттиради. Бу сизга ва жамоага алоҳида босим юкламайдими?
Биз бу ҳақида йигитлар билан гаплашиб олдик. Йигитларнинг асосий мақсади ҳам шу эди. Биз кейинги босқичга чиқишни жуда ҳам хоҳлаймиз ва бунга яқин турибмиз. Футболчилар эртанги беллашувга ҳеч қанақа босимсиз ва ҳаяжонсиз тайёргарлик олиб боришмоқда. Футболчиларнинг кайфияти аъло даражада.
- “Ал-Веҳдат” жамоаси худди “Насаф”га ўхшаб очиқ футбол намойиш этади. Жамоа ўзи ҳам ҳужумкор ўйнаб, рақибга ҳам ҳужумкор ўйнашга имкон беради. Бу “Насаф”га қанчалик қулайлик туғдиради?
“Насаф” билан “Ал-Веҳдат”нинг ўхшаш тарафлари бор. Иккала жамоада ҳам юлдузлар йўқ. Иккала жамоа ҳам курашувчан. Иккала жамоанинг ҳам тайёргарлиги бир-бирига яқин. Бўлиб ўтган ўйинлар шуни кўрсатдики рақибнинг жисмоний тайёргарлиги ҳам анча яхши. Эртанги беллашув анча қизиқарли бўлади. Биз эртага мақсадга эришиш учун максимал даражада ҳаракат қилишимиз керак. Бу ҳам осон бўлмайди. Рақиб ҳам турнирда ўзи яхши томонлама кўрсатмоқда. Жамоанинг ўйинларини кўриб амин бўлдимки, рақиб анча шаклланган. Улар ҳам бекорга Иорданиянинг етакчи жамоаси ҳисобланмайди. Рақибнинг ҳозирги таркиби ҳам бир-бири билан анча йиллардан буён бирга ўйнайди. Биз бу жамоани ўргандик. Улар билан бир марта беллашиб кўрдик. Биз эртанги беллашувга тайёрмиз", - деди Бердиев.
Эслатиб ўтамиз, учрашув эртага Тошкент вақти билан 22:15 да старт олади.
