Бундан роппа-роса 17 йил муқаддам, 2005 йилнинг 1 май куни аргентиналик ҳужумчи Лионель Месси «Барселона» сафидаги илк голини урган эди. У «Албасете» билан учрашувнинг сўнгги дақиқаларида майдонга тушди ва Роналдиньонинг узатмасидан сўнг дебют голини киритди. «Кўк-анорранглилар» сафида биринчи голини урганда Месси атиги 17 ёшда эди.
Эътиборлиси, «Албасете» билан ўйинда Месси иккита гол урган бўлса-да, аргентиналик футболчининг голларидан бири офсайд туфайли ҳисобга олинмади.
Эслатиб ўтамиз, Месси 2005 йилдан 2021 йилгача «Барселона»нинг асосий жамоасида ўйнаган. Шундан сўнг аргентиналик футболчи Париж клубига кўчиб ўтди. 34 ёшли ҳужумчи эркин агент сифатида француз клуби футболчисига айланди. Жорий мавсумда аргентиналик ҳужумчи барча мусобақаларда 30 та ўйинда майдонга тушиб, 9 та гол ва 13 та голли узатмани амалга оширди.
Месси ва «ПСЖ» ўртасидаги келишув келаси мавсум охиригача амал қилади. Трансфермаркт портали футболчининг қийматини 60 миллион еврога баҳолаган.
