Хитойнинг Ханчжоу шаҳрида бўлиб ўтадиган ёзги Осиё ва Параосиё ўйинларида совриндор бўлган ўзбекистонлик атлетлар ҳамда уларнинг мураббийлари пул мукофотлари билан тақдирланади.

Бу ҳақда «2022 йилда Ханчжоу шаҳрида бўлиб ўтадиган XIX ёзги Осиё ва IV Параосиё ўйинларига Ўзбекистон спортчиларини комплекс тайёрлаш тўғрисида»ги президент қарорида эълон қилинди.

Унга кўра, Осиё ва Параосиё ўйинларида олтин медални қўлга киритган спортчилар 5 минг АҚШ доллари миқдоридаги пул мукофоти билан тақдирланади. Кумуш медал соҳиблари 3 минг доллар, бронза эгалари эса 2 минг долларга эга бўлади.

Ғолиб ва совриндорларнинг мураббийлари, шунингдек, атлетга ёрдам берган бошқа мутахассислар ҳам тақдирланиши белгиланган:

Ғолиб ва совриндорларни тайёрлаган мураббийлар:

— Олтин — 2,5 минг доллар
— Кумуш — 1,5 минг доллар
— Бронза — 1 минг доллар

Бошқа мутахассислар (шифокор, диетолог, массажист ва бошқалар):

— Олтин — 2 минг доллар
— Кумуш — 1 минг доллар
— Бронза — 500 доллар

Бундан ташқари, ғолиб ва совриндорлар, тренерлар қўшимча равишда маҳаллий бюджетдан қуйидаги миқдорда бир марталик пул мукофотлари билан тақдирланади.

Ғолиб ва совриндорлар:

— Олтин — БҲМнинг 300 баробари (ҳозирги вақтда 81 миллион сўм)
— Кумуш — БҲМнинг 200 баробари (54 млн сўм)
— Бронза — БҲМнинг 100 баробари (27 млн сўм)

Ғолиб ва совриндорларни тайёрлаган мураббийлар:

— Олтин — БҲМнинг 200 баробари
— Кумуш — БҲМнинг 100 баробари
— Бронза — БҲМнинг 50 баробари

2022 йилги Осиё ўйинлари 10 сентябрдан 25 сентябргача бўлиб ўтади. Параосиё ўйинлари 9—15 октябрь кунлари бўлиб ўтади.