"Арсенал" ҳужумчиси Эдвард Нкетиа келажаги ҳақида гапирди.

“Менинг келажагим тез орада аниқланади. Бизда бор йўғи тўртта ўйин қолди. Мен жамоага бор кучимни бериб, мақсадларимизга эришишда ёрдам бера оламан. Чемпионлар лигасига чиқишга ёрдам берсам, жуда яхши бўларди. Менимча, бунга "Арсенал" ва мухлислар муносиб.

Шундан сўнг мен оилам ва агентим билан ўтириб, қандай давом этишни ҳал қилиш учун вақтим бўлади. Келгуси мавсум қаерда бўлмасин, бахтли бўлсам ва футбол ўйнасам, бу ажойиб бўлади", - деди Нкетиа.

Олдинроқ 22 ёшли футболчига "Вест Хэм", "Нюкасл" ва "Кристал Пэлас" клублари қизиқиш билдираётгани ҳақида хабар берилганди.

Ҳужумчининг “Арсенал” билан амалдаги шартномаси 2022 йилнинг 30 июнига қадар амал қилади.

2021/22 йилги мавсумда Эдвард барча мусобақаларда 24 та ўйинда майдонга тушиб, 7 та гол урди ва битта голли узатмани амалга оширди.