"Бухоро" клуби бош мураббийи Ҳаким Фузайлов Про лиганинг 8-тури доирасида бўлиб ўтган "Ғиждувон"га қарши ўйин (1:1) борасида ўз фикрини билдириб ўтди.

"Ўйин ҳақида гапирадиган бўлсам, биз ушбу ўйинда етакчи сифатида, меҳмонлар эса аутсайдер мақомида майдонга тушишган эди. Хақиқий «бухороча» дерби десам муболаға бўлмайди. Рақиб ўйин бошида гол уриб олгач, қолган вақтни майдонда ётиб олиш билан ўтказди. Шунга қарамай, жуда кўп вазиятлар яратдик, афсус, тўп дарвозага киришни хоҳламади. Менимча, яратган вазиятларимиз 3 та ўйинга етарли эди. Шунақа ўйинлар ҳам бўлиб туради.

Афсус, нималар бўлганини қайтадан кўриб чиқиб, хатоларимизни кўздан кечирамиз. Суперлига йўлланмаси учун курашаётган жамоалар билан курашни давом эттираверамиз, ҳар бир очко учун. Шавкат Саломовнинг қизил карточка олганига келсак, ушбу вазиятга баҳо бериш мен учун ҳозир қийин, лекин Шавкатнинг рақиб футболчисига қўпол ҳаракати албатта бу хунук ҳолат, биз буни кўриб чиқиб таҳлил қиламиз. Таркибимизда, 20 футболчи бор, «Андижон» билан бўлиб ўтадиган ўйинга муносиб тайёрланамиз", — деди Фузайлов.