ФИФА президенти Зепп Блаттер ва ОФК президенти вазифасини бажарувчи Чжанг Цзилонг бугун Тошкентга етиб келишди. Фахрий меҳмонлар шарафига қабул дастурхони ёзилди ва унга ўзбек футболи жамоатчилигининг бир гуруҳи таклиф этилди. 

Кечани ЎФФ президенти Мираброр Усмонов кириш сўзи билан очди ва Блаттер жаноблари шаънига илиқ фикрларни айтиб, дунё футболига қўшаётган ҳиссаси эътироф этилди.

Зепп Блаттер ҳам ўз навбатида Мираброр Зуфаровичга илиқ сўзлар учун ташаккур билдирди ва уни “Дўстим Мираброр” деб атади.

— Ҳозирги кунга келиб, Ўзбекистон ФИФА тасарруфи остидаги мусобақаларни, тадбирларни ўтказиши мумкин. Жумладан, юртингиз ФИФА конгрессини қабул қилиш имкониятига эга.

Бугун кунда дунё аҳли ўзбек футболини асосан Равшан Эрматов орқали танийди. Умид қиламан, Бразилияда ўтадиган Жаҳон чемпионатига Эрматов билан биргаликда Ўзбекистон миллий терма жамоаси ҳам бориши мумкин. Мен буни жуда ҳам истайман. Ўзбекистон шундай салоҳиятга эга жамоа. Фақат озгина ҳаракат қилса бўлгани, — деди ФИФА раҳбари.