ФИФА президенти Зепп Блаттер Ўзбекистонга ташрифи доирасида 16 май, чоршанба куни Тошкентнинг бир қатор диққатга сазовор жойларида бўлди.
ФИФА раҳбарининг ташриф дастурига кўра, у дастлаб пойтахт марказидаги «Форумлар саройи»да меҳмон бўлди. Шундан сўнг Навоий кўчасида қад ростлаган «Симпозиумлар саройи»да бўлган нуфузли меҳмон бу каби ҳашаматли иншоотлар уни ҳайратга солганини тан олди.
ФИФА президенти, шунингдек, Тошкентнинг Чилонзор туманида қурилиши давом этаётган «Бунёдкор» стадионида ҳам бўлиб, у ерда олиб борилаётган ишлар билан танишди. Шундан сўнг Зепп Блаттер Ўзбекистондаги айни вақтда энг катта – «Пахтакор» ҳамда янги қуриб битказилган «Локомотив» стадионларини ҳам бориб кузатди.
Шаҳар бўйлаб саёҳат давомида жаҳон футболи раҳбарига Ўзбекистон футбол федерацияси Президенти Мираброр Усмонов ҳамда ОФК президенти вазифасини бажарувчи Жанг Жилонг ҳамроҳлик қилишди. Ташрифлар орасида Зепп Блаттер ЎФФда ташкил этилган матбуот анжуманида иштирок этишга ҳам улгурди.
