ЎФА қошидаги футбол мутахассисларини тайёрлаш марказида ОФКнинг «ПРО» дипломи бўйича модул дарслари бўлиб ўтди. Модул давомида ФИФА техник консультанти, таниқли мутахассис Гаёз Дарсадзе 23 нафар мураббийга амалий ва назарий кўникмаларини бериб борди.

Бугун Ўзбекистон футбол ассоциациясида мазкур курсларнинг якуни ва мураббийлар таълими борасидаги кейинги режалар муҳокама қилинди. Суҳбат аввалида курсларда таълим олган ёш мураббийларимизнинг салоҳияти ҳақида сўз борди.

ЎФА биринчи вице-президенти Равшан Эрматов футбол кундан кунга ривожланиб бораётгани, ўз устида ишлайдиган, доимий равишда билимини ошириб борадиган, замонавий талабларга жавоб берадиган мутахассис-кадрларни тайёрлаш ва қайта тайёрлаш муҳим вазифа эканини таъкидлаб ўтди. Жисмоний ва техник тайёргарлик мураккаб жараён эканлиги, бу йўналишларга илмий ёндашув зарурлигини қўшимча қилди.

Суҳбат давомида бугунги футболда техник директорларнинг ўрни ҳақида ҳам сўз борди. Ёш футболчиларнинг ўсиб бориши ва ривожланишини доимий мониторинг қилиш юзасидан бир қатор масалалар муҳокама қилинди. Академиялардаги таълим ва машғулотлар бевосита техник директорлар назорати остида эканлиги, барча жараёнларни ташкил этишда бу мутахассисларнинг билим ва савияси муҳим эканлиги таъкидланди.

Учрашув давомида болалар-ўсмирлар футболини ривожлантириш, барча ёш тоифасидаги футболчиларни ягона электрон базасини шакллантириш, оммавий футбол билан шуғулланувчилар сонини ошириш юзасидан фикр алмашилди. Гаёз Дарсадзе халқаро андозалар асосидаги намунали академияларга қўйиладиган талаблар ҳақида маълумот берди. Шунингдек, аёллар футболимизда ўсиш кузатилаётгани, аввалги ташрифидан сўнг бу йўналишда тизимли ишлар йўлга қўйилганини қўшимча қилди.

Самимий ва конструктив руҳда ўтган учрашув якунида ФИФА техник консультанти Гаёз Дарсадзе бир қатор йўналишлар юзасидан ўз таклифларини берди. Томонлар ҳамкорликни давом эттиришга келишиб олишди.