O‘FA qoshidagi futbol mutaxassislarini tayyorlash markazida OFKning «PRO» diplomi bo‘yicha modul darslari bo‘lib o‘tdi. Modul davomida FIFA texnik konsultanti, taniqli mutaxassis Gayoz Darsadze 23 nafar murabbiyga amaliy va nazariy ko‘nikmalarini berib bordi.

Bugun O‘zbekiston futbol assosiasiyasida mazkur kurslarning yakuni va murabbiylar ta’limi borasidagi keyingi rejalar muhokama qilindi. Suhbat avvalida kurslarda ta’lim olgan yosh murabbiylarimizning salohiyati haqida so‘z bordi.

O‘FA birinchi vise-prezidenti Ravshan Ermatov futbol kundan kunga rivojlanib borayotgani, o‘z ustida ishlaydigan, doimiy ravishda bilimini oshirib boradigan, zamonaviy talablarga javob beradigan mutaxassis-kadrlarni tayyorlash va qayta tayyorlash muhim vazifa ekanini ta’kidlab o‘tdi. Jismoniy va texnik tayyorgarlik murakkab jarayon ekanligi, bu yo‘nalishlarga ilmiy yondashuv zarurligini qo‘shimcha qildi.

Suhbat davomida bugungi futbolda texnik direktorlarning o‘rni haqida ham so‘z bordi. Yosh futbolchilarning o‘sib borishi va rivojlanishini doimiy monitoring qilish yuzasidan bir qator masalalar muhokama qilindi. Akademiyalardagi ta’lim va mashg‘ulotlar bevosita texnik direktorlar nazorati ostida ekanligi, barcha jarayonlarni tashkil etishda bu mutaxassislarning bilim va saviyasi muhim ekanligi ta’kidlandi.

Uchrashuv davomida bolalar-o‘smirlar futbolini rivojlantirish, barcha yosh toifasidagi futbolchilarni yagona elektron bazasini shakllantirish, ommaviy futbol bilan shug‘ullanuvchilar sonini oshirish yuzasidan fikr almashildi. Gayoz Darsadze xalqaro andozalar asosidagi namunali akademiyalarga qo‘yiladigan talablar haqida ma’lumot berdi. Shuningdek, ayollar futbolimizda o‘sish kuzatilayotgani, avvalgi tashrifidan so‘ng bu yo‘nalishda tizimli ishlar yo‘lga qo‘yilganini qo‘shimcha qildi.

Samimiy va konstruktiv ruhda o‘tgan uchrashuv yakunida FIFA texnik konsultanti Gayoz Darsadze bir qator yo‘nalishlar yuzasidan o‘z takliflarini berdi. Tomonlar hamkorlikni davom ettirishga kelishib olishdi.