Қирғизистоннинг «Дордой» клубида ўзбекистонлик икки нафар мураббий иш бошлашди.

Сергей Арсланов катта мураббий вазифасига тайинланган бўлса, Ислом Аҳмедов унга маслаҳатчи сифатида иш бошлайдиган бўлди. Қизиқ томони, улар билан бор-йўғи бир ойлик шартнома имзоланди.

Бунинг сабаби бор. "Дордой" июнь ойи сўнгида ОФК кубоги гуруҳ босқичида иштирок этади. Демак, мураббийлар олдига жамоани кейинги босқичга олиб чиқиш вазифаси қўйилган. Агар вазифа бажарилса, шартнома узайтирилиши мумкин.

Гуруҳ босқичи ўйинлари эса Бишкек шаҳридаги Долен Умурзаков номидаги стадионда ўтказилади. Ушбу гуруҳдан Тожикистоннинг "Хўжанд" ва Туркманистоннинг "Копетдоғ" клублари ҳам ўрин олишган. Гуруҳ ғолибигина кейинги босқичга чиқади ҳамда "Сўғдиёна" ўрин олган "F" гуруҳи ғолиби билан тўқнаш келади.

Клуб бош директори Руслан Сидиқов ўзбекистонлик мураббийлар билан шартнома имзолангани борасида қуйидаги фикрларни билдириб ўтди:

«Қирғизистон чемпионатида ўзимизга мос бўлмаган ўринни эгаллаб турганимиз учун, шунингдек, Қирғизистон кубогидан чиқиб кетганимиз сабабли, бош мураббий Мурат Жумакеев билан ўзаро келишган ҳолда шартномани бекор қилиш ҳақида қарор қабул қилдик. Айни пайтда ўзбекистонлик икки мутахассисни ишга таклиф қилдик. Улар ОФК кубогида жамоани бошқаришади».

Сергей Арсланов "Дордой" билан шартнома имзолагач, ўз мақсадлари билан ўртоқлашди:

"Биринчи навбатда таклиф учун клуб раҳбариятига миннатдорчилик билдираман. Клуб ҳақида нима дейишим мумкин? Ҳа, клуб ҳақида маълумотга эгаман. Жамоанинг «Абдиш-Ата»га қарши ўйинини томоша қилдим, ўйинчилар билан танишдим. Ҳақиқатан ҳам яхши футболчилар йиғилган. Яхши ижрочилар бор. Асосий эътиборни ўйинни ташкил қилишга қаратамиз. Жамоа олдига юқори мақсадлар қўйилган. Вазифамиз — ОФК кубогида гуруҳдан кейинги босқичга чиқиш!»

Маълумот:
Арсланов Сергей Сергеевич
Туғилган куни: 06.11.1986
Фуқаролиги: Ўзбекистон
Маълумоти: олий.
Мураббийлик маълумоти: Про-лицензия
Мураббийлик фаолияти давомида "Машъал", "Шўртан", "Андижон", "УзДонгЖу" клублари ва Ўзбекистон U16 терма жамоасида ишлаган.