Ўзбекистон Кубоги 1/8 финал босқичидан ўрин олган «Андижон»  - «Олмалиқ»жамоалари ўртасидаги учрашувдан сўнг, «Андижон» жамоаси бошлиғи Анвар Солижонов ўйин борасида фикрлари билан ўртоқлашди.

«Машъал» жамоаси устидан қозонилган ғалабадан сўнг, футболчилар бу ўйинга ҳам жанговар руҳда тайёргарлик кўришди. Йигитлар ўйиндан олдин фақат ғалаба ҳақида ўйлашаётганди. Лекин биринчи бўлимда меҳмонлар бизга жиддий қаршилик кўрсатишди.  Танаффусдан кейин эса футболчиларимиз ташаббусни ўз тарафларига оғдиришди».

«Шуни айтишни истардимки, бугунги натижа ўйинга мос бўлмади. Чунки жамоамизда жуда кўплаб голли вазиятлар юзага келди. Аммо биз уларнинг учтасидан фойдаландик, холос».

«Эътибор берган бўлсангиз, бугун майдонда фақат маҳаллий футболчилар тўп суришди. Ёш футболчилар ҳозирда мураббийнинг ишончини оқлаб келишмоқда. Жамоамиздаги хорижлик футболчилар айни пайтда жароҳатларини даволатиш билан бандлар. Улар энди асосий таркибга қайтишлари учун маҳаллий футболчилардан устун эканликларини исботлай олишлари керак».

«Иккинчи даврада таркибимизда ўзгаришлар бўладими? Ҳозирча бу саволингизга  аниқ жавоб бера олмайман. Лекин таркибни кучайтириш учун асосий эътиборимизни маҳаллий ўйинчиларга қаратамиз. Олмалиқда кечадиган жавоб учрашувида бугунгидан ҳам яхшироқ ўйнашга ҳаракат қиламиз», дея клуб бошлиғининг сўзларидан иқтибос келтирмоқда клуб расмий сайти.