Кеча, Ўзбекистоннинг тўрт карра чемпиони делегацияси Осиё Чемпионлар лигаси 1/8 финал учрашувини ўтказиш учун Корея Республикасига етиб борган.

Хабарингиз бор, бу галгиси “қалдирғочлар”нинг “Эрталабки тетиклик” мамлакатига жорий мавсумдаги иккинчи ташрифидир. Бунгача жамоамиз “Е” гуруҳидаги 2-тур учрашувлари доирасида Похан шаҳрида 20 март куни мезбонлар – “Похан Стилерз” клуби билан рўбарў келиб, маҳаллий жамоа устидан 2:0 ҳисобида чиройли ғалабага эришган эди. Мана, орадан икки ойдан ортиқ вақт ўтиб, “Бунёдкор” яна Кореяга сафар уюштирди. Аммо жамоамиз олдидаги мақсад яна ўша-ўша – Тошкентга фақат ва фақат ғалаба билан қайтиш. “Сонгнам Илхва Чонма” (ҳа, рақибимизнинг номи корейсчада айнан шундай талаффуз этиларкан) билан ўйин оғир кечиши аниқ. Лекин барча ўзбекистонликлар Миржалол Қосимов шогирдларидан якунда фақатгина ижобий натижа кутишмоқда...

Кеча кечқурун Тошкент халқаро аэропортидан парвоз амалга оширган ҳаво лайнери делегациямизни 6 соат вақт деганда, бу ерда тонг тушиб бўлган маҳалда Сеулдаги “Инчхон” аэропортига олиб келди. Кейин “Бунёдкор” аъзолари автобусда тахминан 2 соатча йўл босиб, Сувон шаҳрига етиб келдилар. Ҳа, жамоамиз Сонгнам шаҳрида эмас, ҳозир айнан Сувонда қўним топган. Боиси, Корея майдони жиҳатидан унча катта мамлакат эмас ҳамда бу юртдаги шаҳарлар орасидаги масофа ҳам узоқ эмас. Сонгнам билан Сувон бир-бирига жудаям яқин жойлашишган – ёнма-ён деса ҳам бўлаверади. Сувондан Сонгнамгача машинада ярим соатли йўл.

Сувонда биз “Айбис Сувон Амбассадор” отелига жойлашдик. Делегациямиз меҳмонхонанинг бутун 9-қаватини эгаллади. Маҳаллий об-ҳаво Тошкентдагисидан озгина фарқ қилади: пойтахтимизда 32-34 даража иссиқ бўлса, бу ерда +25-27.