Эден Азар 2019 йилда «Реал Мадрид» томонидан сотиб олинади. Мана уч йилдирки, футбол ихлосмандлари 31 ёшли ҳужумчининг қайтишини кутмоқда. Аммо Азар «Челси»даги каби юксакликка эриша олмади. Унинг омади келмаяпти. «Қироллик клуби» футболчи учун 88,5 миллион фунт сарфлаганди. Агарда бонуслари билан қўшиб ҳисоблаганда, бу қиймат 100 миллиондан ошиб кетади. Бироқ, бельгиялик юлдуз ЕЧЛ финалида «Ливерпуль»га қарши ҳатто майдонга ҳам туширилмади. Унинг майдондаги иши яхши эмаслиги рост. Аммо майдондан ташқарида ҳаммаси жойида. Қуйида шу ҳақида қисқача сўз боради.
Эден Азар айни дамда ўз оиласи билан Мадрид шаҳридаги ҳашаматли сароймонанд уйда кун кечирмоқда. Ушбу уйнинг нархи қарийб 10 миллион фунтга тенг. Уй «Ла Финка» деб номланувчи мавзега яқин бўлиб, у ерда «Реал»нинг қолган футболчилари истиқомат қилади. Уй испан архитектори Хуакин Торрес томонидан лойиҳалаштирилган бўлиб, ўзининг қора рангли тошли қатлами ва жиҳозланиши билан ажралиб туради.
Ҳашамдор уй ўз ичига олтита ётоқхона ҳамда ўндан ортиқ ваннани олади. Бу шароитларнинг барчаси фақат беш киши: Азар, унинг аёли Наташа ва ўғиллари Яннис, Лео ҳамда Семига хизмат қилади. Собиқ «Челси» футболчисининг уйида бассейн ва тренажор зали ҳам мавжуд. Қулайликлар эса фақат бу билан чекланмайди. Шунингдек, Азарнинг кошонасида сиз, СПА, махсус дам олиш ускуналарига эга хона ва теннис майдончасини учратасиз. Оила кечки пайтлари биргаликда уй кинотеатрида истаган дастурини томоша қилиши мумкин...
Уйнинг нархига яраша замонавий жиҳатлари ҳам анчагина. Бутун бошли уй юқори даражали аниқликда ишлайдиган ва сунъий онг орқали бошқариладиган автоматик тизимга эга. Бу эса яшовчиларга максимал қулайлик яратиб беради. Уйнинг айрим хоналари девори йирик-йирик биллурлар билан безатилган бўлиб, бу нарса хонани ҳеч қандай электр токисиз табиий нурни акслантириш орқали ёритиш имконини беради.
Эден Азар бундай уйни машҳур испан хонандаси, 17 карра «Гремми» мукофоти ғолиби Алехандро Сансдан харид қилганди. Шунга қарамай, бу уй футболчига омад келтирмади. Чунки у асосий жамоаси бўлган «Реал»да муваффақият қозона олмаяпти. Аммо Азар таслим бўлишни ўйлагани йўқ ва олдинга интилмоқда. Хусусан, у ЕЧЛ совринини нишонлаш кечасида «Реал» мухлисларига кейинги мавсум умуман бошқача бўлиши ҳақида ваъда берганди.
ИСМАТОВ Ж.
