"Челси" "Интер" ҳимоячиси Милан Шкриньяр билан шартнома имзолаш учун ўз футболчиси Рубен Лофтус-Чик билан хайрлашишга тайёр, деб хабар беради Daily Mail.
Ҳозирда Шкриньярга асосий давогар Франциянинг "ПСЖ"си бўлиб турибди. Клуб “Интер”га футболчи учун 50 миллион евро таклиф қилган, бироқ “нерадзуррилар” камида яна 20 миллион евро талаб қилмоқда.
"Челси"нинг Лофтус-Чик билан шартномаси 2024 йилнинг ёзига қадар тузилган. У ўтган мавсумда барча турнирларда 40 та ўйинда майдонга тушиб, битта гол урди ва 5 та голли узатмани амалга оширди.
Аввалроқ, футболчи учун Италиянинг бошқа бир клуби "Лацио" қизиқаётгани ҳақида хабар берилганди.
2021/22-йилги мавсумда Шкриньяр “Интер” сафида 48 та ўйинда майдонга тушиб, 4 та гол урди. Ҳимоячининг клуб билан амалдаги шартномаси 2023 йилнинг июнь ойи охиригача амал қилади.
