«Локомотив» ёшларга ва ўз тарбияланувчиларига ишонч билдиришда давом этади.

Ўтган йил клубининг икки тарбияланувчиси — Нурмуҳаммад Тошпўлатов билан Жавоҳир Абдуалимов Суперлигада дебют қилганди. Бу йил эса ҳозирча тўрт нафар ёш футболчи асосий жамоада илк бор майдонга тушди.

Қуйида ушбу футболчилар ҳақида қисқача тўхталиб ўтамиз.

Али Абдураҳмонов — ҳужумчи, 2003 йил туғилган.
Суперлига 2-туридан ўрин олган «Локомотив» — АГМК баҳси Али Абдураҳмонов учун Суперлигадаги илк ўйин бўлди. Ўшанда Али асосий таркибда майдонга тушиб, 78 дақиқа ҳаракат қилди.

Шерзод Комилов — ярим ҳимоячи, 2002 йил туғилган.
Шерзод Комилов жамоанинг яна бир футболчиси Дилшод Комиловнинг укаси. Суперлига 7-туридан ўрин олган «Нефтчи» — «Локомотив» учрашуви Шерзод учун Суперлигадаги дебют беллашув бўлди. У 81-дақиқада Санжар Қодирқулов ўрнига майдонга тушди.

Анвар Алижонов — ярим ҳимоячи, 2002 йил туғилган.
Суперлига 12-тур «Локомотив» — «Сўғдиёна» баҳсида клубнинг яна бир тарбияланувси Анвар Алижонов илк бор асосий жамоада ўз дебютини амалга оширди. Алижонов ўйиннинг 72-дақиқасида Ислом Рашидхонов ўрнига майдонга тушиб, ўзини кўрсатишга ҳаракат қилди.

Абдуллоҳ Йўлдошев — ҳимоячи, 2003 йил туғилган.
Абдуллоҳ Йўлдошев ҳозирча Суперлигада майдонга тушмаган бўлсада, «Хоразм» билан кечган Кубок ўйинида асосий жамоа либосида илк бор ҳаракат қилди. Жамоамиз 2:1 ҳисобида зафар қучган баҳсда Абдуллоҳ 88-дақиқада Нурмуҳаммад Тошпўлатов ўрнига майдонга тушганди.