Украина терма жамоаси ва "Манчестер Сити" ҳимоячиси Александр Зинченко бразилиялик ярим ҳимоячи Фернандиньонинг клубдан кетиши ҳақида фикр билдирди. Тажрибали ярим ҳимоячи "Атлетико Паранаэнсе" билан шартнома имзолаб, ватанига қайтди.
"Бу шунчаки футболчи эмас. Фернандиньо майдонда ҳам, майдон ташқарисида ҳам етакчи эди. Мен сиздан кўп нарсаларни ўргандим ва невараларимга сиз ҳақингизда албатта айтиб бераман.
Келажакда сизга энг яхши тилакларимни тилайман, сиз бунга лойиқсиз. Мен сизни яхши кўраман, ака" - деб пост қолдирди Александр Зинченко ижтимоий тармоқларда.
Фернандиньо 2013 йилдан 2022 йилгача "Манчестер Сити"да ўйнаган. Унинг ҳисобида 383 та ўйинда 26 та гол ва 33 та голли узатма бор.