"Локомотив" профессионал футбол клуби FOOTBALL GROUP ва бир гуруҳ санъаткорлар билан биргаликда 1 июнь – Болаларни ҳимоя қилиш халқаро кунига бағишланган тадбирни амалга оширди.
Бу кун ёзнинг биринчи куни нишонланиб, энг иссиқ халқаро байрамларнинг бири ҳисобланади. Бу кунни нишонлаш ҳақида 1949 йилнинг ноябр ойида Халқаро аёллар демократик федерациясининг махсус сессиясида қарор қабул қилди.
Биринчи Халқаро болаларни ҳимоя қилиш куни 1950 йили нишонланди. БМТ бу ташаббусни кўллаб-қувватлади ва болаларнинг ҳақ-ҳуқуқларни, ҳаётини ва саломатлигини сақлаш ўз фаолиятининг устувор йўналишларинг бири эканлигини эълон қилди.
Болаларнинг ҳимоя қилиш куни бугунги кунда Ўзбекистонда жуда кенг нишонланади. Шу жумладан яқин ҳамкорларимиз билан биргаликда Локомотив клуби ҳам Ватанимиз келажаги бўлган болажонларимизга озгина бўлса ҳам мехр улашиш мақсадида 2 июнь куни Мирзо Улуғбек туманида жойлашган ТТЗ мавзеси, Ахмад Югнакий ва Ҳумоюн мавзесида яшовчи болалар ва уларнинг ота оналари учун кичик концерт ташкил этдилар. Ёш ҳонандаларимиз Э.Агзамов, У.Амирхон, Ж.Мирсолиев, Ж.Отабеков, Ж.Йўлдошев, Даво гурухи, В.Нурматов, Сахро.уз ва яна бир неча ёш, истеъдодли қўшиқчилар билан болаларга қувонч улашдилар.
Ушбу тадбирда Жасур Отабеков ва Жавоҳир Йўлдошев томонидан Локомотив клубига бағишланган қўшиқ ҳам куйланди. Локомотив ПФК рахбарияти ҳам ўз совғалари билан барчани табриклади.
Болаларимиз бизнинг келажагимиз. Уларнинг соғ ва ақлан етук бўлиб етишида Президентимизнинг саъй ҳаракатлари таҳсинга сазовор. Юртимизда Президентимиз бошчилигида болаларни ҳар томонлама соғлом, бахтиёр ўсиб улғайишлари учун барча имкониятлар яратилган. Шу жумладан янги спорт масканлари, стадионлар қурилиши, юртимиздаги буюк бунёдкорлик ишлари ҳам ёшларимиз учун катта имконият эшикларини очади. Болалар куни билан барча болажонларимизни, уларнинг ота оналарини табриклайман – дейди Локомотив ПФК бош директори Рустам Абдуллаев.
