Россиянинг «Нижний Новгород» клуби «Насаф» ҳимоячиси Шерзод Насруллаевга қизиқиш билдирмоқда. Россиялик журналист Анар Ибрагимов тарқатган хабарга кўра, "аждарлар" ўз футболчиси учун 250 минг доллар ва футболчининг кейинги трансферидан 20% улуш сўрамоқда.

Нижний новгородликлар эса 200 минг доллари ва 15 фоизлик улуш таклиф қилишди. Бу таклиф «Насаф»ни қаноатлантирмади. Шу боис, томонлар музокарани вақтинчалик тўхтатишди.

Шунингдек, манбага кўра, Насруллаевга Туркия чемпионати жадвалининг қуйи қисмидаги баъзи клублар қизиқиш билдишган (жумладан, Суперлига дебютанти «Умраниеспор» клуби). Аммо Шерзод апрель ойида жароҳат олгани учун футболчининг Туркияга кўчиб ўтиши вақтинчалик тўхтаб қолди.

«Турк клублари номидан агентлар алоқага чиқишган. Музокаралар ҳозирда суст кечмоқда. «Нижний Новгород» эса Насруллаевга бўлган қизиқишни сақлаб турибди», – дея хабар тарқатди.

Бундан ташқари, «Нижний Новгород» клуби «Насаф» Ҳусайн Норчаевга ҳам қизиқиш билдирган. Маълумотларга қараганда, «Насаф» 20 ёшли футболчи 700 минг доллар сўрамоқда, аммо бу сумма рус клубини қаноатлантирмаяпти», – дейилади манбада.

Журналист Анар Ибрагимовга кўра, «Нижний Новгород» дастлаб Иброҳимхалил Йўлдошевни сотиб, сўнгра «Насаф»дан Шерзод Насруллаевни сотиб олишни режалаштирган. Ҳозирча 21 ёшли футболчи борасида расмий таклифлар йўқ. Аммо клуб бундай таклиф бўлишига албатта ишонмоқда.

Маълумот ўрнида. Насруллаев ўтган мавсумда «Насаф» сафида 22та ўйинда иштирок этиб, 3та гол ва 7та ассист муаллифига айланган. Шерзод жорий мавсумда 6та ўйинда майдонга тушди.