Жаҳон чемпионати саралаш босқичи доирасидан ўрин олган Ливан ва Ўзбекистон миллий терма жамоалари ўртасидаги учрашув олдидан иккала жамоа бош мураббийлари иштирокида матбуот анжумани ташкил қилинди.

Унда иштирок этган Ливан терма жамоаси бош мураббийи Тео Баккер дастлаб Ўзбекистон терма жамоасининг Эронга қарши ўйинида мезбонлар яхшироқ ўйин кўрсатганини таъкидлаб ўтди: "Эрон ва Ўзбекистон терма жамоалари ўртасидаги ўйинни кўрдим. Бу учрашувда мағлубиятга учраганига қарамай, Ўзбекистон терма жамоаси жуда ажойиб ўйин кўрсатди. Бироқ сўнгги дақиқаларда ўтказиб юборилган гол натижасидаги мағлубият аламли бўлди. Мен буни яхши тушунаман".

"Бундай мағлубият жамоаларга руҳий жиҳатдан салбий таъсир қилиши мумкин, аммо Ўзбекистон бундай ҳолатда нима қилишни жуда яхши билади", дейди Баккер.

Баккер унинг жамоаси ҳам биринчи турда Ўзбекистон ҳолатига тушганини таъкидлаб ўтди: Ўзбекистон терма жамоасининг Эронга мағлубиятини яхши тушунаман. Зеро, биз ҳам Қатарга худди шунга ўхшаш ҳолатда мағлубиятга учрадик"

Терма жамоадаги муаммолар борасида берилган саволга Баккер барчаси жойида деган маънода жавоб қайтарди. "Ҳеч қандай муаммо йўқ. Хаммаси жойида. Фақат матбуот биздан Қатар билан ўйинда кўп нарса кутганлиги учун ноҳақ танқид қилди, Биз бунга муносиб эмасдик", дея мураббийнинг сўзларидан иқтибос келтирмоқда ЎФФ матбуот хизмати твиттери.