"Барселона" ҳужумчиси Усмон Дембеле жамоа билан янги шартнома имзолагандан сўнг ўз фикрлари билан ўртоқлашди.
"Мен қолганимдан ҳурсандман. Умид қиламанки, бу мавсум мен учун энг яхшиси бўлади. Мен машғулотларда ва залда боримни бериб шуғулланаман. Бу мавсум "Барса" учун унутилмас бўлади деган умиддаман.
Жароҳатлар туфайли илк уч мавсум жуда қийин ўтди, аммо ҳозир ҳаммаси ўзгарди. Ҳозир менга ишонч билдиришяпти, ва мен ҳам анча ўсишга эришдим.
Шартномани янгилаш доим менинг хоҳишим бўлган, мен бу ҳақда мураббийга ҳам, президентга ҳам кўп бора айтдим. Мен жамоамга совринлар ютишга ёрдам бериш учун мавсум бошланишини интизорлик билан кутмоқдаман, мен "Барса" учун боримни бермоқчиман. Мен Чемпионлар Лигасини ютишни истайман, ва мен ушбу совринни шу жамоада ютиш учун имконим бор бўлган барчасини қилишга тайёрман", - деди Дембеле.
Маълумот учун, француз каталонияликлар билан 2024 йилгача мўлжалланган янги шартнома имзолади.
