«Энергетик-БГУ» клуби директори Александр Захарченя жамоа ҳужумчиси Бобур Абдихолиқов ҳақида ўз фикрини билдириб ўтди.

"Яхши таклиф тушса, биз Бобурни жамоада ушлаб қолмаймиз. Аммо баъзи жиҳатлар бор. Баъзида футболчи янги синовларга тайёр бўлмайди. Мураббийлар штаби ўйинчининг тайёргарлигини статистика орқали аниқлаб боради. Масалан, футболчининг жисмоний ҳолати айни пайтда ўсиш жараёнида. Шу боис, биз унга ушбу ёки бошқа жиҳатдан ҳали юқори формага чиқмаганини айтамиз. Эркак киши 27 ёшгача жисмоний жиҳатдан шаклланади. Буни унутамнг. Бундан ташқари, руҳий ҳолат ҳам бор...

“Ислочи”дан бир футболчи бор эди, мен унинг исмини айтмайман: 16 ёшда унга катта юклама берилган. Олтита ўйиндан кейин эса унинг тикланиши учун 2 йил вақт кетди. Ёки тескари мисол: Денис Садовскийни биз ўз вақтида бошқа жамоага қўйиб юбордик. У эса ҳозир “Гомель”да ёрқин ўйин кўрсатмоқда. Футбол — бу бизнес. Биз футболчини имкон қадар яхшироқ тайёрлаб, клуб учун ҳам, ўйинчи учун ҳам кўпроқ фойда олишга ҳаракат қиламиз. Футболчи янада юқорироқ савияда ўйнашга тайёр эканини билсак, уни бажонудил қўйиб юборамиз. Шу билан биргаликда дўстона алоқаларни сақлаб қоламиз. Мисол учун, Шаҳбоз Умаров баҳорда жамоамизга келди, ўзига таниш йигитлар билан гаплашди, биз унга эсдалик совғасини бердик", — деди клуб директори.

Эслатиб ўтамиз, Бобур Абдихолиқов Беларусь чемпионатининг жорий мавсумида 14та ўйинда иштирок этиб, 14 гол ва 4 ассист муаллифига айланди.