«Манчестер Юнайтед» клуби собиқ футболчиси Тедди Шерингем ҳужумчи Криштиану Роналду ҳақида ўз фикрини билдириб ўтди.

«Вазият шундай бўлишини олдиндан билгандим. Одамлар Эрик тен Хаг жамоани Роналду атрофида тузиши керакми ёки йўқми — муҳокама қилишмоқда. Аммо Криштиану жамоадан кетишни истаса, у кетади. Бу эса «МЮ» учун янги имкониятларни очади.

Роналдунинг маошига 2-3 нафар янги ўйинчи сотиб олиши мумкин. Криштианунинг маоши катта харажат ҳисобланади.

Ҳаёт давом этади. Криштиану бошқа жамоада ўйнашни истаётган бўлса, унинг ўрнига мавсум давомида барқарор ва кучли ўйин намойиш этадиган футболчи топинг.

Роналду клубда бўлаётган ишларни кузатмоқда. Фергюсон пайтидаги ва ҳозирги вазиятни таққосламоқда. Ҳозирги ишлар унга ёқмаяпти. Футболда бир жойда туриб қолсанг, муваффақиятсизликка учрайсан. Роналду ҳам шундай ўйлаётган бўлиши мумкин. Криштианунинг ўрнида бўлганимда мен «Юнайтед»га: «Трансфер бозоридаги ишигиз орқали мени қойил қолдиринг», деган бўлардим.

Криштиану юқори даражада ўйнай олиши учун 1-2 йил вақт қолди. У мазкур муддатдан завқ олишга ҳақли», – деди Шерингем.