Аввал хабар берганимиздек, "Локомотив" жамоаси шу кунларда Тошкент вилояти Дукент шаҳарчасида ўқув-машғулотлар йиғинини ўтказмоқда. Мазкур йиғин доирасида жамоа мураббийлар штаби икки нафар янги футболчини кўздан кечирмоқда.

Булар футбол мухлисларига яхши таниш бўлган тажрибали ўйинчи Акмал Холматов ҳамда ёш, умидли футболчи Аюбхон Гаппаровлардир. Холматов узоқ йиллар Фарғонанинг "Нефтчи" жамоаси шарафини муносиб ҳимоя қилган ва миллий чемпионатимиздаги энг моҳир футболчилардан бири, деб эътироф этилганди. Кейинчалик у Тошкентнинг "Пахтакор" клуби сафига кўчиб ўтди. Холматов аввалига пойтахтликлар сафида ҳам ёмон таассурот қолдирмаётган эди. Аммо, кейинчалик у жиддий жароҳат олиб, узоқ муддатга сафдан чиқди ва жамоадаги ўрнини йўқотди. Натижада Акмал Эроннинг "Пас" жамоасига ижарага берилди.

Аюбхон Гаппаровни эса мухлислар "Пахтакор" мактаби тарбияланувчиси сифатида яхши билишади. У ўз вақтида Роберт Гай бошчилигидаги мамлакат ўсмирлар терма жамоасининг етакчи футболчиларидан бири саналарди. Аммо, фаолиятини Россиянинг номдор клуби "Рубин"да давом эттиришни ихтиёр этган ёш иқтидор эгаси қозонликларнинг ўринбосарлар жамоасида бир мунча муваффақиятли тўп сурди, бироқ асосий жамоага ўрнашиб ололмади.

Янги футболчилар "Локомотив" жамоасида ўз ўрнини топиша оладими? Буни яқин орада билиб оламиз. Дарвоқе, Гаппаров темирйўлчилар сафидаги илк ўйинида битта голга муаллифлик қилди. Демак, бошланиши ёмон эмас.