Машғулот ўйинлари бўлса-да, Эрик Тен Хаг бирмунча «гибкий» мураббий эканини пайқаш мумкин.

Масалан, аввалги ўйинларда «МЮ» 4-2-3-1 схемасида ҳаракат қилди ва Тен Хаг тўп назорат қилишда қанот ҳимоячиларини марказга кириб ўйнашга кўрсатма берди. Қанотларни эса, Санчо ва Рэшфорд кенгайтиради. Одатда, Пеп Гвардиола «Сити»да «билд-ап»ни шунақароқ асосда қуради. Бу ўзига яраша янгилик.

Бугунги ўйинда эса, Скотт Мактоминей йўқлиги учун жамоа 4-3-3 га яқин схемада ҳаракат қиляпти, яъни Фред орқароқда, Ван Де Бек эса, Мактоминейдан фарқли равишда, олдинроқда, Бруну билан бир чизиқда ўйнаяпти.

Балки шунинг учунми, Тен Хаг олдинги ўйинлардаги билд-апдан воз кечди. Энди ҳужум бошлашда қанот ҳимоячилардан бири (асосан Шоу) учинчи марказий ҳимоячига айланяпти, нариги қанот эса, анча олдинга чиқяпти. Ўз навбатида, ўша қанотдаги вингер жарима майдонига яқинроқ тўп суриши мумкин. Эътибор берган бўлсангиз, биринчи таймдаги ҳар икки голда ўхшашлик бор - Рэшфорд ҳам, Санчо ҳам айнан яримқанотда тўпни қабул қилиб, ҳужумни давом эттиришди.

Бундай позицион ўйинда, албатта, Марсиялнинг роли ҳам ўзгаради - у кўпроқ марказни тўлдириб, алдамчи тўққизликка айланяпти ва қанотдагиларга зона очиб бермоқда.

Қайсидир маънода, бугунги ўйин Сульшер услубининг такомиллашган вариантига ўхшайди.

Хуллас, ҳар қандай схема ва йўналишда жамоавий ўйин савиясига путур етмаслиги жуда муҳим жиҳат. Таркибда ротация қилиш, ҳатто бир ўйинда турли йўналишлар билан рақибни чалғитишда қўл келади. Кузатамиз.

Қаҳрамон Асланов.