Ўзбекистон Кубоги 1/8 финал дастлабки ўйини доирасида «Бунёдкор» Ғузорнинг «Шўртан» клубини қабул қилади. «Қалдирғочлар»нинг Осиё чемпионлар лигаси ним чорак финалидаги ўйини сабаб, мамлакат Кубогининг ним чорак финалидан жой олган учрашув қолган ўйинлардан анча кеч ўтказилмоқда.

Жорий мавсум ҳисобидан Тошкентда бир марта меҳмон бўлган Игорь Криушенко шогирдлари 0:3 ҳисобида имкониятни бой беришди. Бунга қадар 2та ўйинни ўз фойдасига ҳал қила олган «Шўртан»дан кўпчилик бу каби мағлубиятни кутмаганди. Умуман олганда Ғузор жамоаси йилдан-йилга кучайиб бораётган бўлсада, клубнинг «Бунёдкор»га қарши статистикаси мақтанишга арзигулик эмас. Миллий чемпионат доирасида 13 бор майдонга чиққан жамоалар, фақатгина 2 марта муросага рози бўлишган. Бор йўғи 1та ўйинда «Шўртан» зафар қучган, қолган 10та беллашув тошкентликлар фойдасига ҳал бўлган. Тўплар нисбати – 29:3.

Ўзаро ўйинларда энг номдор футболчи сўзсиз Виктор Карпенкодир. «Шўртан»га қарши ўйинларда «Бунёдкор» шарафини 12 марта ҳимоя қилган футболчи, тўрт бор зафар қучиб, ҳар икки статистика бўйича ҳам пешқадам бўлиб турибди. Шунингдек, «Бунёдкор»нинг Олий лига тарихидаги энг йирик ғалабаси ҳам айнан «Шўртан» устидан қозонилган бўлиб, 2008 йилги мавсумда жамоа ғузорликлар дарвозаси жавобсиз етти бор ишғол қилинган.

Меҳмонлар устози Игорь Криушенко «Шўртан» билан иккита фрон: Ўзбекистон Кубоги ва чемпионатида кураш олиб бораётган бўлса, Миржалол Қосимов тўртта фронтда иштирок этмоқда. «Бунёдкор»ни Осиё чемпионлар лигаси чорак финалига олиб чиқа олган Қосимов, Ўзбекистон миллий терма жамоаси билан жаҳон чемпионати йўлидаги саралашда иштирок этмоқда.