Тошкент шаҳри мезбонлик қилган оғир атлетика бўйича ўсмирлар ва ёшлар ўртасидаги Осиё чемпионати ўз ниҳоясига етди. Ҳар қандай мусобақа фақат спортчи учун эмас, балки уларнинг устозлари учун ҳам муҳим синов ҳисобланади. Супачага чиққан вақтида шогирдиданда кўпроқ ҳаяжонланадиган, ютуқларидан севинадиган инсон ҳам устоздир.

Осиё чемпионати якунида шогирдларининг муваффақиятидан қувонаётган Ўзбекистон ёшлар терма жамоаси мураббийи Жўрабек Зоировнинг мусобақа борасидаги фикрларига қулоқ тутдик.

“Юртимизда ўтказилган ўсмирлар ва ёшлар ўртасидаги Осиё чемпионати ўз ниҳоясига етди. Мусобақада 25дан ортиқ давлатдан келган спортчилар ғолиблик учун кураш олиб боришди. Ушбу қитъа биринчилигида тўлиқ таркиб билан иштирок этдик. Асосий рақибларимиз Эрон, Вьетнам, Туркманистон, Қозоғистон, Қирғизистон ва Индонезия давлатларидан келган спортчилар бўлишди. Муросасиз кечган беллашувларда ёшларимиз ҳар бир вазн тоифасида ўзларининг шахсий рекордларини янгилашди. Мусобақанинг сўнгги кунида эса оғир вазн тоифасидаги шогирдим Мирҳосил Мирзабоев ёшлар ўртасида олтин, икки курашда кумуш медаль соҳибига айланди.

Ўсмир ва ёшлар ўртасида умумжамоа ҳисобида ўғил болаларимиз 1-ўринни қўлга киритишди. Қизлар ўртасида эса ёшлар умумжамоа ҳисобида 1-ўринга, ўсмир қизлар эса 2-ўринга сазовор бўлишди. Бошқа давлатлардан келган спорчилар ҳам яхши натижа билан ўз ватанларига қайтишди. Бу каби мусобақаларнинг юртимизда ўтказилиши аввало Ўзбекистон номини дунёга танитиш учун катта имконият бўлса, қолаверса, спортчиларимизга Жаҳон чемпионати, Олимпиада ўйинларида иштирок этиш учун замин яратади. Кейинги мусобақамиз жорий йилнинг август ойида Туркиянинг Коня шаҳрида бўлиб ўтадиган Ислом бирдамлик ўйинларидир. Ушбу мусобақада янги таркиб билан иштирок этамиз. В Ислом бирдамлик ўйинларидан ҳам юқори натижалар билан қайтиш ниятимиз бор,” – дея сўзини якунлади мураббий Жўрабек Зоиров.

Маълумот учун, ўсмирлар ва ёшлар ўртасидаги Осиё чемпионати баҳсларида қатнашган Турсуной Жабборова, Шарофиддин Амриддинов, Нигора Сувонова каби истеъдодли спортчиларимиз Ислом бирдамлик ўйинларида иштирок этишади.