Давралар оралиғидаги танаффус пайтида ўз таркибини кучайтиришга ҳаракат қилаётган “Навбаҳор” таркибига ёзги трансфер “ойнаси” ёпилишига саноқли дақиқалар қолганида яна бир легионер қўшилди.

Бу жамоа мухлисларига яхши таниш бўлган россиялик ҳужумчи Александр Касьян.

Касьян 1989 йилнинг 27 январида Украинанинг Донецк вилоятида таваллуд топган. Футболчилик фаолияти давомида Украинанинг “Ильичевец” (Мариупол), “Шахтёр” (Донецк), “Заря” (Луганск), “Карпати” (Львов), Россиянинг “Томь” (Томск), “Химик” (Дзержинск), “Факел” (Воренеж), “Балтика” (Калининград) ва Курскнинг “Авангард” жамоаларида тўп сурган.

Шунингдек, Украина U-17 ҳамда Украина U-21 терма жамоаларида ҳам ўйнаган.

2019 йилдан юртимизда фаолиятини бошлаган Александр Касьян шу йили “Навбаҳор” таркибига қўшилиб, “лочинлар” сафида 24 та ўйинда майдонга тушиб, 10 та гол урган ва битта голга ассистентлик қилган.

Украиналик ҳужумчи 2020 йилги мавсумни Термизнинг “Сурхон” жамоасида ўтказиб, термизликлар таркибида 25 та баҳсда майдонга тушиб, 8 та гол урди.

Александр Касьян ўтган мавсумда Олмалиқнинг АГМК клуби сафига қўшилади ва айни пайтгача олмалиқликлар таркибида 31 та ўйинда 6 та гол урди.

Жорий мавсумнинг 1-давраси учрашувларида тажрибали ҳужумчи АГМК таркибида 10 та баҳсда майдонда ҳаракат қилди.