"Реал"нинг собиқ футболчиси Предраг Миятович мадридликлар ҳужумчиси Карим Бензема 2022 йилда "Олтин тўп"ни қўлга киритишига ишонч билдирмоқда.
"Ўтган йили Карим "Реал"да ўринбосар йўқлиги билан деярли ҳеч қандай муаммога дуч келмади. Бензема "Олтин тўп"ни қўлга киритиши аниқ. "Реал"га захира ўриндиғида ўтириб, ўз имкониятини кутишга тайёр бўлган ёш ҳужумчи керак. Бундай талаблар билан ўйинчи билан шартнома имзолаш осон эмас, лекин бизда бутун август ойи бор, биз ҳали нимадир қила оламиз" - деди Миятович Cadena SER билан суҳбатда.
34 ёшли франциялик футболчи ўтган мавсумда “Реал” сафида 46 ўйинда 44 та гол урди ва 15 та голли узатмани амалга оширди. Унинг клуб билан шартномаси 2023 йилнинг 30 июнига қадар амал қилади.
Эслатиб ўтамиз, мавсум якунида "қаймоқранглилар" Ла Лига ва Чемпионлар Лигасини қўлга киритди.
