"Манчестер Юнайтед"нинг собиқ футболчиси Рио Фердинанднинг фикрича, клуб португалиялик ҳужумчи Криштиану Роналдуни олиб қолиш-қолмасликни тезда ҳал қилиши керак. Роналду "Райо Вальекано"га қарши ўртоқлик учрашувида майдонга тушди ва биринчи бўлимда ўйнади.

"Агар миш-мишлар рост бўлса ва у ҳақиқатан ҳам кетишни истаса, клуб мухлиси сифатида клуб тезроқ бир қарорга келишини истардим. Ўтган йили Гарри Кейн мисолида бўлганидек, мен ҳаммаси чўзилиб кетишини истамасдим" - деди Фердинанд The Mirror нашри билан суҳбатда.

Ушбу ҳафтада Англия Премьер-лигаси бошланади, "Манчестер Юнайтед" биринчи турда "Брайтон"га қарши ўйнайди.