Испаниянинг "Лас-Палмас" клуби шифокорлари ярим ҳимоячи Кириан Родригесга лимфа тизимининг хавфли касаллиги бўлган Хожкин лимфомаси ташхисини қўйишди. Бу ҳақда спортчи махсус матбуот анжуманида айтиб ўтди.
Родригес мавсумолди текширувлар вақтида ўзини ёмон ҳис қилганини айтди. Душанба куни испаниялик футболчи қўшимча текширувдан ўтди ва унда хавфли ўсма борлиги аниқланди.
"Менда Хожкин лимфомаси борлигини тасдиқланди, алоҳида кураш бошлайман. Бу жамоадошларимникидан кўра умуман бошқача кураш бўлади. Мен даволанаман ва бир муддат майдондан ташқарида бўламан, аммо декабрда қайтишни режалаштиряпман", - деди Родригес.
Marca газетасининг ёзишича, биринчи ўйинда “Лас-Палмас” мухлислари ўйиннинг 20-дақиқасида футболчини қарсак чалиб, унга ҳурмат кўрсатишади. Чунки, у 20-рақам остида ўйнайди.
