Хабарларга қараганда, ”Челси” Обамеянгга қизиқмоқда ва “Барселона” сотиб олмоқчи бўлаётган Аспиликуэта+Алонсо учун габонлик футболчини ўз сафига қўшиб олмоқчи.

Обамеянг, АПЛ тажрибасига эга, яхши спорт формасида бўлиши керак – ўтган мавсумнинг иккинчи ярмида Ла Лигада 10 та гол уришга муваффақ бўлди. “Челси” Лукакуни қўйиб юборгач, табиийки, голеадор ҳужумчига эҳтиёж сезади – Батшуайи билан узоққа бориб бўлмас, тўғрими? Бундан ташқари, Обамеянг  ўз вақтида Томас Тухел билан “Боруссия”да ишлаганини ҳам эътиборга олиш керак. Ҳаммаси мос келяпти.

Лекин “Барселона”да Обамеянг билан ҳам боғлиқ  ғалати ҳолат бор. Тўғри, Френки Де Йонг даражасида бўлмаса ҳам, якун қандай ечим топади, қизиқ. Хуллас, клуб Обамеянг билан шартнома тузаётганда, биринчи мавсумда (яъни ўтган мавсумнинг иккинчи ярми) деярли маош тўламаслик, иккинчи мавсумда (2022/23) 18 миллион евро тўлашга келишилган. Яъни илк мавсумда ойлик тўламаслик ҳисобига кейинги йилга кўпроқ бериш кўзда тутилган. “Барселона” маошлар лимити бўйича муаммога учраганини ва Ферран Торресни заявка қилишда қийналганини эсласангиз керак.

Хўш, энди Обамеянг сотиладиган бўлса, футболчи рози бўладими? Ўйин амалиёти бўйича “Челси” яхшироқ, “Барселона”га Левандовски келди, Фати қайтди. Аммо ҳужумчи аввалги мавсум миннатдорчилиги учун сунъий ошган маошдан воз кечиб, “Челси”га қайта оладими? 18 миллион евро Обамеянгни АПЛнинг энг маоши катта футболчилардан бирига айлантиришини ҳисобга олсак, лондонликлар бундай пулни таклиф қилишлари қийин.

“Барселона” трансфер бозорида “ёряпти”. :)

Қаҳрамон Асланов