Ўзбекистон олий лигасининг 10-тури сўнгги учрашувида Қаршининг “Насаф” жамоаси “Бунёдкор” меҳмони бўлиб 0:0 ҳисобида дуранг натижа қайд этди.

Учрашувнинг илк дақиқаларидан ўйин ташаббусини ўз қўлига олиш ва яққол устунликка эришиш учун ҳар иккала жамоа аъзолари ҳаракат қилишди. Бироқ гоҳ у, гоҳ бу жамоа футболчилари олдинга ўтишиб, ҳужумкор ўйин намойиш этишди.

Бироқ биринчи бўлимда ҳеч бир футболчи таблога ўз номини ёздириб қўя олмади. Очиғини айтганда, голга тортадиган яққол вазиятлар ҳам содир этилгани йўқ.

Танаффусдан сўнг “Насаф” аъзолари бутун эътиборларини ҳимояга қаратишиб, “Бунёдкор”ни қарши ҳужумда жазолашга ҳаракат қилишганини сезиш қийин эмасди. Умуман олганда, қаршиликлар дурангга рози ҳолда ўйин кўрсатишгани яққол билиниб турди. Усмон Тошевнинг ушбу тактикаси қайсидир маънода ўзини оқлади, дейиш мумкин.

“Бунёдкор” аъзолари бутун жамоа бўлиб олдинга ўтишди. Лекин “Насаф”нинг зич ҳимоясини ёриб ўтиш “қалдирғочлар”га насиб этмади.

Шу тариқа, “Бунёдкор” ва “Насаф” дуранг ўйнашиб, ўз ҳисобларига биттадан очко қўшиб қўйишди.

Олий Лига. 10-тур
БУНЁДКОР – НАСАФ 0:0

БУНЁДКОР: 1. Игнатий Нестеров, 2. Акмал Шораҳмедов, 4. Хайрулла Каримов, 6. Анвар Ғофуров, 8. Жавлон Иброҳимов, 10. Шавкат Саломов, 13. Лутфулла Тўраев (28. Руслан Мелзиддинов, 82), 16. Артём Филипосян, 17. Камолиддин Мурзоев (24. Баҳодир Пардаев, 87), 22. Виктор Карпенко, 33. Ян Козак (20. Анваржон Солиев, 74).

НАСАФ: 42. Мурод Зухуров, 4. Мақсуд Каримов, 5. Ботир Қораев, 8. Андрейс Переплёткинс, 16. Алишер Юсупов, 17. Артур Геворкян, 18. Фозил Мусаев, 19. Иван Бошкович, 20. Эркин Бойдуллаев, 33. Шуҳратбек Мирхолдиршаев (27. Илҳом Юнусов, 80), 34. Боян Малишич.

Огоҳлантиришлар: Артем Филипосян (6), Хайрулла Каримов 52 – Шуҳратбек Мирхолдиршаев (31).