Парагвай 2030 йилги Жаҳон чемпионати мезбонлиги учун ўз номзодини илгари сурган Жанубий Американинг тўртта давлати қаторига киритилгани ҳақида хабар берган эдик. Булар Парагвайдан ташқари Аргентина, Чили ва Уругвайдир.
Айни пайтда парагвайлик энг машҳур собиқ дарвозабон 57 ёшли Хосе Чилаверт кескин қаршилик кўрсатди. Унинг фикрича, мамлакатда жуда кўп ижтимоий муаммолар мавжуд.
"Парагвайга Жаҳон чемпионати эмас, шифохоналар, йўллар керак. Мен айнан шуларга устунлик берган бўлардим" - деди Чилаверт.
Бироқ, шу ўринда эътиборга олиш керак: Чилаверт ҳозирда сиёсат билан шуғулланади ва худди либериялик Жорж Веа каби ўз мамлакати президентлигига интилмоқда. Шу сабабли, унинг лойиҳани танқид қилиши ҳозирги ҳукумат режалаштирган ҳамма нарсани танқид қиладиган мухолифатчининг одатий ҳаракати бўлиши мумкин.
