Хабарингиз бор, Ўзбекистон миллий терма жамоаси футболчилари — Александр Гейнрих ва Темур Кападзе яқинда Қозоғистоннинг "Актобе" клубига қўшилишди. Улар дам олиш кунлари ўтказилган Премьер-лиганинг 13-тур ўйинлари доирасида "Сункар"га қарши баҳсда асосий таркибда майдонга тушиб, ўйинн тўлиқ ўтказишга ҳам улгуришди. Эътиборли томони, Темур Кападзе баҳснинг 90-дақиқасида гол киритиб, ғалабасига муҳим бўлган 3 очкони келтирди.

Ўйиндан кейинги матбуот анжуманида "Актобе" бош мураббийи Владимир Муханов футболчиларимиз ҳақидаги қуйидагиларни таъкидлади:

— Ўйин арафасида таркиб билан боғлиқ муаммоларга дуч келдик. Кенжисариев Москвадаги йиғин давомида жароҳат олгани туфайли, бугун майдонга туша олмади. Гейнрих ва Кападзе ўйин арафасида сафимизга етиб келишди ва тўғри майдонга тушишди. Биринчи бўлимда ҳисобни очганимиздан кейин иккинчи бўлимда йўқ жойдан гол ўтказиб юбордик. Яхшиямки характер кўрсатиб, ғалаба тўпини киритдик. Голни жамоамизнинг икки янги аъзоси — Александр Гейнрих ва Темур Кападзе вужудга келтиргани рамзий маънога эга бўлса керак. Гейнрих ҳимоячини таъқиб қилди ва Кападзе гол урди. Ташқаридан қараганда ғалабамиз ҳаққоний эмасдек кўриниши мумкин, аммо бу ғалаба биз учун жуда ҳам муҳим эди.